Министерството за внатрешни работи денеска соопшти дека е познат идентитетот на лицето кое вчера нападна новинари од „Нова ТВ“ во трговскиот центар Бисер во општина Аеродром.
Станува збор за 38-годишниот А.Б. кој најпрво го нападнал новинарот со насилно однесување, туркање на телефонот со кој снимал и влечење и виткање на раката, а потоа и снимателот со удар во камерата со која снимал. Новинарската екипа била на службена задача, односно покривала настан за граѓанската иницијатива за собирање потписи против изградба на бегалски кампови.
– По целосно документирање на настанот, против лицето ќе биде поднесен соодветен поднесок до надлежното Основно јавно обвинителство Скопје, а во врска со основано сомнение за сторено кривично дело „насилство“, се наведува во соопштението.
МВР нагласува дека е одлучно во намерата да ја прекине практиката на неказнето напаѓање и попречување на новинари во извршувањето на нивните работни задачи.
