Македонците се очекува да бидат меѓу стотината нации и етнички групи кои ќе бидат застапени во планираниот голем музеј на народите кои ја сочинуваат денешната американска нација. Иницијативата за изградба на овој нов музеј, во близината на зградата на Конгресот во центарот на Вашингтон, ја доби поддршката на конгресмените од двете најголеми партии.
Коалиција од 83 организации кои претставуваат разни американски етнички заедници, деновиве упатија писмо дo претседателот Барак Обама во кое бараат да се создаде комисија за основање на музејот. Меѓу потписниците е и Обединетата македонска дијаспора, и нејзиниот претседател Мето Колоски кој вели дека вклучувањето во оваа иницијатива значи дека и Македонците ќе бидат одбележани меѓу народите кои се доселиле во САД.
Предвидено е музејот да содржи артефакти и инсталации кои ќе ги преставуваат домородните американски племиња, првите доселеници главно од Англија и робовите од Африка, периодот на доселување на луѓе главно од европски држави во 19 и 20 век, и четвртата современа фаза на доселување на граѓани од целиот свет.
– Националниот музеј на американските народи ќе биде крстопат на секоја американска група и сведоштво за историјата на нашата нација. Темата на музејот се изразува преку нашето мото, E Pluribus Unim, од многумина, ние сме едно, пишува Сем Ешканази, директор на коалицијата, во писмото упатено до претседателот Обама.
Писмото до претседателот го потпишале претставници на организации на Полјаците, Корејците, Италијанците, Русите и многу други заедници од САД, а од нашиот регион, покрај здружението на Македонците, потписници се здруженија и на Бугарите, Албанците, Босанците, Грците и на Турците.