Премиерот Никола Груевски изјави дека тоа што лидерот на СДСМ Бранко Црвенковски жали што не бил порадикален е многу опасна и загрижувачка изјава, за која треба да размислат и членовите на неговата партија.
– Не знам во што можел да биде порадикален – дали требало да пука во народот од другата страна, кој се собра да изрази незадоволство од неговото однесување, дали жали што не успеа да го пробие кордонот и да ги нападне од другата страна луѓето кои стоеја, кои беа главно пензионери и земјоделци, приматели на социјална помош и други загрижени граѓани од случувањата, кои тој ги навести и почна да ги прави, изјави Груевски.
Според него, таквата изјава треба да ги замисли не само тие што се легитимно избрани на власт, туку и членовите на СДСМ кои, како што рече, треба да се прашаат кого следат и каде тој ги води.
– Се сеќаваат граѓаните што направи. И дека сега по секоја цена, по цена на жртви, по цена на повредени, по цена на тотално уништување на имиџот и на угледот на државата, сака со насилство да се врати на власт, додаде Груевски во изјава по промоција на нови наслови од проектот за превод на илјада стручни книги.