Премиерот, Никола Груевски, одби да одговори на пратеничкото прашање на Горан Мисовски од НСДП, кои се странските служби кои го вршеле масовното прислушување во кое биле следени комуникациите на илјадници македонски граѓани. Груевски му порача на пратеникот за истото прашање да побара одговор кај првобвинетиот во случајот „Пуч“, поранешниот директор на УБК, Зоран Верушевски.
-Го упатувам Мисовски да ја следи судската расправа во која верувам посочената личност ќе каже кој стоел зад него. Можеби одговорот го знае и оној што му прати писмо во кое кажува детали поврзани со други држави и премиери. Мисовски подобро од нас може да дознае и преку судскиот случај и преку човекот кој праќал писмо до Верушевски – рече Груевски мислејќи на лидерот на СДСМ, Зоран Заев.
Мисовски рече дека не е задоволен од одговорот. Вие тврдите, рече тој, дека прислушувале странски служби, а не Верушевски.
-Верушевски не беше на прес и не го кажа тоа што вие го кажавте. Лично вас ве прашувам, посочивте странска служба, од вас барам да и го објасните тоа на јавноста. Зошто не го повикавте амабсадорот од таа земја и зошто не го протеравте? Тоа е европски стандард. Вие посочувате на странска служба затоа ве повикав јавно да ја обелодените странската служба и државата која стои зад неа. Жалам што не ја искористивте шансата да ја посочите странската служба како и земјата која стои зад неа и жал ми е што невини луѓе лежат во затвор – рече Мисовски.
Маја Васева