„Имаме капацитет да работиме и да напредуваме, како што имаме и право да бидеме незадоволни од оваа неправда што ни се случува, и тоа не е прашање на Груевски или Црвенковски, или Георгиевски или Петковски, или Тачи или Ахмети, или на кој било политички лидер или индивидуалец. И оттука, некои реакции на моето интервју за МИА дека било емотивно се нелогични и се критика без јасна цел, која доаѓа од луѓе кои не знаат да разликуваат вистина од емоција“
Ова го истакна премиерот Никола Груевски во одговорот на дописот од пратениците од СДСМ.
– Ние и понатаму ќе останеме посветени на реализацијата на стратешката определба за членство во НАТО, и ќе работиме во таа насока.
Во одговорот на дописот од пратениците на СДСМ тој посочува дека ваква реакција од опозицијата воопшто не го изненади и оти ја очекувал и „тоа токму заедно со тонот со кој е пишувана“.
– А и самите знаете дека е пишувана од една рака, која се крие зад вашите потписи, принцип адекватен на се останато во вашата партија, посочува премиерот.
– Граѓаните треба да не дозволат оваа неетичка злоупотреба на позицијата која ја има нашиот јужен сосед и класична демонстрација на неконструктивно однесување, кое е во спротивност со основните начела на НАТО Алијансата-еднаквоста, слободата и владеењето на правото, на меѓународното право, да ги совлада, потишти или пак да им ги помати перцепциите и приоритетите, пишува Груевски.
„Не сакаме и не знаеме да бидеме лицемерни, и додека некој ни ја попречува иднината и перспективата на два милиони граѓани на оваа земја да премолчуваме или да наведнуваме глава, или да се самообвинуваме за нешто што е вина на друг! – Не. Ние кажуваме директно. Јасно и прецизно. Искрено и чесно. Никогаш не очекувајте дека ќе лажеме.
– Политиката што досега ја промовираа некои од лидерите на опозицијата, како политика на свиткан рбет и криење на реалноста, не ја прифаќам како метод во политиката и однос кон сопствениот народ. Ако некој ја каже реалноста и вистината тогаш тој е емотивен, непримерен или кавгаџија. А ако некој го лаже сопствениот народ дека му го менува името во привремена референца и дека таа референца ќе трае само два месеци е визионер? Тоа ли се вашите вредности? Јас лично тоа не го прифаќам“, вели Груевски. Не го прифаќам, истакнува тој, лицемерието како израз на политиката.