Во пресрет на муслиманскиот празник Рамазан Бајрам синоќа премиерот Никола Груевски присуствуваше на Ифтар вечера заедно со повеќе граѓани, членови на ВМРО-ДПМНЕ од исламска вероисповед.
На вечерата во Скопје присуствуваа повеќе од 100 учесници, Албанци, Македонци муслимани, Бошњаци, Роми и Турци.
Премиерот Груевски на присутните им посака убави празнични денови, среќа и спокој на верниците кои го празнуваат празникот Рамазан Бајрам. Тој посака и единство, хармонија и заемно почитување кое, како што нагласи, треба да биде единствениот пат кој може да донесе економски, културен и сеопшт развој на државата.
Ваквите настани, посочи тој, се добра прилика да се разменат мислења, но и да се прати порака на единство бидејќи соживотот и меѓусебното почитување имаат вековна традиција меѓу луѓето кои живеат на овие простори. Потенцира дека тоа треба да биде примерот кој треба да биде следен во сечие делување и работа.
Во текот на вчерашниот ден премиерот Груевски присуствуваше на Ифтар во Струга заедно со повеќе Македонци муслимани.