Премиерот на Република Македонија, Никола Груевски, по повод 22 Ноември – Денот на албанската азбука, упати честитка до припадниците на албанската етничка заедница во Република Македонија.
„Одбележувањето на ваквите празници во современите мултиетнички општества е исклучително важно и значајно. Преку нив ја негуваме толеранцијата, го валоризираме меѓусебното почитување, учиме еден за друг и живееме еден покрај друг. Едноставно, кога некој празнува, секој друг кој го почитува, го смета за близок и пријател, се придружува кон прославата и изразите на почит. На овој начин потврдуваме дека секој воспоставен празник е празнување на сите граѓани на Република Македонија, и на нашата заедничка иднина и иднината на целиот регионот.Верувам дека со заеднички сили, верувајќи во заедничките вредности, ќе продолжиме со спроведувањето на реформите и модернизацијата на нашата земја, со напорите за обезбедување на услови за економски раст и развој и унапредување на стандардот на граѓаните, и со прогрес во сите останати општествени сфери со цел изградба на силна, модерна и напредна Република Македонија, член на Европската Унија и НАТО“, се вели во честитката.