За денеска е закажано првото рочиште по тужбата на премиерот Никола Груевски против лидерот на НСДП Тито Петковски.
За клевета и навреда Груевски од Петковски бара 15.000 евра, бидејќи го клеветел и навредил.
Груевски го тужи Петковски бидејќи за неделникот Фокус на 30.11.2012 година изнел невистини дека пред Букурешкиот самит во 2008 година Груевски предложил новото име на Република Македонија да биде Република Македонија-Скопје.
„Мојот предлог Груевски јавно да соопшти, односно да го повтори својот став од 2008 година, Груевски го доживеа како штетно по неговиот углед и чест. Особено што тужителот секогаш изјавува дека нема да прифати ниту едно решение за проблемот на името без спроведување референдум. Повредата на честа и угледот цитирам „кај тужителот предизвика јака душевна болка која може да се излекува само со 950 000 денари или со 15 000 евра. Се разбира таквата душевна болка нема наод на вешто лице – психијатар. Искрено, се до овој момент живеев во убедување дека парата не ја лечи душата“, вели Петковски.
Груевски најверојатно нема да се појави на рочиштето. Вчера имаше извештаи за неговата посета на Кина.