Северна Македонија и Црна Гора негуваат добро пријателство и соработка, почитувајќи ги истите вредности, оние на Европската Унија и НАТО, оценија на денешната средба првиот вицепремиер и министер за политички систем и односи помеѓу заедниците Артан Груби и амбасадорката на Црна Гора во земјава, Марија Петровиќ.
Како што соопшти Кабинетот на Груби, на средбата било истакнато дека земјава има важна и конструктивна улога во унапредувањето на односите меѓу земјите од Западен Балкан и во исто време е добар пример каде граѓаните покажаа демократска зрелост и се одлучија за владеење на правото и демократските вредности.
Во соопштението се додава дека Петровиќ му се заблагодарила на Груби за поддршката што Република Северна Македонија и ја дава на Црна Гора на нејзиниот пат кон интеграцијата во Европската Унија и двајцата се заложиле дека двете земји треба да продолжат да одржуваат добри билатерални односи и на тој начин да ја зајакнуваат економската соработка.