Градоначалникот на општина Битола Владимир Талески денеска врачи решенија за легализирани објекти на повеќе битолски семејства кои имаа отпочнато процедура за легализација на своите објекти пред надлежните органи.
На денешната средба со новинарите Талески истакна дека досега општината издала над 2.000 решенија со што се вбројува во една од најдобрите општини во државата.
– Во Битола се евидентирани над 12.500 барања, но најголем дел од нив се со нецелосна документација. Денес доделивме 17 нови решенија со кои се легализираат нови објекти кои на сопствениците им овозможуваат сигурност и можност за преземање други мерки. Овие објекти ќе бидат впишани во деталните урбанистички планови, истакна градоначалникот Талески.
Постапката за легализација на објекти согласно законите во општина Битола ќе биде интезивирана за што во локалната самоуправа се обучени посебни тимови за брза обработка во општинската администрација.