Градинката „Срничка“ денеска доби донација – прочистувачи на воздух од нафтената компанија „Лукоил Македонија“. Прочистувачите се наменети за занималните на објектот „Калинка“ во Стар Аеродром.
На примопредавањето на донацијата присуствуваа регионалниот управител на руската компанија „Лукоил Македонија“, Андреј М. Куку и градоначалникот на општина Аеродром Златко Марин.
– Децата се нашата иднина и ние треба да се грижиме за нив. Ова е само еден почеток на нашата заедничка соработка и во иднина ќе имаме уште многу заеднички проекти, изјави Куку.
Градоначалникот Марин истакна дека прочистувачите се од исклучително значење за здравјето на дечињата, особено во зимскиот период од годината, кога загадувањето на воздухот достигнува високо ниво. Посочи дека во тек е тендер за набавка на 83 прочистувачи на воздух кои ќе се постават во сите простории во секоја градинка на територијата на општина Аеродром. Станува збор за интервентна мерка на општината во борбата со нечистиот воздух.
Општина Аеродром информира дека покрај краткорочните, активно работи и на изнаоѓање долгорочни мерки за решавање на проблемот со амбиенталниот воздух, во соработка со Град Скопје и останатите надлежни институции.