Градоначалникот на Град Скопје, Петре Шилегов на денешната прес конференција информираше дека е започната постапка за набавка на нови 40 еколошки автобуси кои ќе произведуваат помалку ПМ10 честички од сегашните.
Како што кажа Шилегов проектот е финансиран со кредит од Европската банка од 10 милиони денари, со 0% камата.
„Доколку се оди по планот, наесен ќе биде распишан тендерот за овие 40 автобуси а договор за истите ќе има до крајот на годината“, рече градоначалникот на Скопје.
Две третини од новите автобуси ќе бидат зглобни, на еден кат, а една третина ќе бидат единечни, исто така на еден кат.
Тој истакна дека големиот број автобуси што беа набавени од минатата власт не се еколошки подобни, брзо се расипуваат и не постои можност за сервисирање бидејќи нема овластен застапник.
„Граѓаните на Скопје го заслужуваат најдоброто и затоа Град Скопје ќе се потруди да им овозможи најсовремен јавен превоз“, рече Шилегов.
Градоначалникот истакна дека по набавката на новите автобуси оние најстарите кои се користат за замена на новите автобуси ќе бидат исфрлени од употреба и нема да има промена на цените на билетите.
Виктор Јованов