На престојните локални избори ќе има голема излезност на Албанците, покажале анкетите на владејачката ДУИ, што е изненадување имајќи ги предвид бројките од претходните избори на кои Албанците покажуваа незаинтересираност и апстинираа од гласање.
Во партијата ваквиот пресврт во гласачкото тело сметаат дека е резултат на говорите на Груевски во Кичево и Струга полни, како што велат, со шовинизам. Повикот на Груевски, и старо и младо да излезело на гласање во Кичево и Струга за да биле градоначалниците Македонци, ги мотивира и нашите гласачи да одговорат со иста мерка во сите градови, а не само во тие што ги кажа премиерот, велат извори од владејачката албанска партија.
Во партијата сметаат дека и без да ги повикаат албанските гласачи во Скопје, својот глас ќе го искористат масовно и ќе гласаат за кандидатот на опозицијата, Јани Макрадули. Овој пресврт го знаеле и во штабот на кандидатот на власта за Скопје, актуелниот градоначалник Коце Трајановски, кој претходниот мандат го доби со подршка на гласовите од Албанците кои живеат во Скопје.