Според Петар Гошев, екс гувернер на Народната банка, актуелната Влада континуирано ја лаже јавноста и уставната измена за ограничување на јавниот долг е трик за да продолжи да ја лаже јавноста.
„Оваа Влада е најавантуристичка кога се работи за трошење на јавните пари. Нема гаранција дека границата од 60% е безбедна ако имате гангстери на власт. Тоа е бандитизам и измама на сопствениот народ”, рече Гошев во емисијата Тренд на 24Вести.
Според екс гувернерот Владата лаже за висината на јавниот долг и измислува закони со кои ги дискриминира граѓаните.
„Блеферите во власта не може да ни продаваат дисциплина за трошење на парите на народот”, рече Гошев.
Според Гошев и втората уставна измена за формирање на слободни, територијални и економски зони е само натпревар кон дното.
„Најпатриотската партија секој ден ја распродава Македонија за џабе. Оваа измена е за да можат оние алчни и незаситни делови од светот кои се само 1%, да дојдат и да експлоатираат и во Македонија. Тие кријат даноци.
– Власта и Македонија сака да ја направи како Девствените острови, Кајманските острови или Белизе. Тоа е држава во држава. Не ми го цитирајте министерот за финансии Ставрески. Тој постојано лаже”, рече Гошев.