Во Велес попладнево избувна пожар на градската депонија. Според информацијата од Противпожарната единица во Велес, пожарот избувнал околу 16 часот.
– И покрај брзата интервенција на екипите на ЈКП „Дервен“ кое стопанисува со депонијата и помошта од пожарникарите на ТПП единица, пожарот се уште не е локализиран, што значи дека депонијата се уште гори, информира за МИА, Љупчо Лепидовски, командир на ППЕ Велес.
Велешките пожарникари им помагаат на екипите на ЈКП „Дервен“ со една цистерна за вода, а се затрупува и со песок.
– Според информациите од терен очекуваме во текот на ноќта пожарот да се локализира. Работите околу локализација на пожарот ни ги отежнува силниот ветер, информира Лепидовски.
Засега не се знаат причините за пожарот на градската депонија, но очевидци тврдат дека се почестите пожари на градската депонија во Велес ги предизвикуваат собирачите на стара пластика.
Официјално информација за причините за се почестите пожари на велешката градска депонија, треба да соопштат надлежните од СВР Велес.