Големо распукување и свлечиште се појави на патниот правец Прилеп – Витолиште, на десеттина километри кај селото Штавица. Патот е опасен за тешки товарни возила, констатираа денеска од Македонија пат-подружница Прилеп и од локалната самоуправа, кои вршат увид на самото место.
Според Гоце Стефаноски, раководител на подружницата на Македонија пат, ова е голема опасност за сообраќајот кон Витолиште и Мариово.
– На патот изминатите десеттина дена се забележаа свлечишта на земјиштето и има големо оштетување на патниот правец. Сообраќајот се одвива тешко. Неопходно е да се преземат мерки за сообраќајот да се одвива непречено. Во оваа состојба патот може целосно да се свлече до реката. Препорака е да се избегнува овој патен правец. Оштетени се 200 метри во ширина и околу 250 метри во должина и неопходен е поголем зафат, изјави Стефаноски.
Тој рече дека ќе се изврши корекција со ново тампонирање. – Во овој момент ќе се изврши само мала корекција со тампон. Денеска ќе биде прооден патот. Утре е неизвесно и пожелно е да се забрани сообраќајот за тешки товарни возила. Препорака е да се избегнува овој патен правец. Надлежните се информирани, вели Стефаноски.
Градоначалникот на Прилеп Марјан Ристески со препорака патот да биде затворен за тешките товарни возила и да се избегнува неколку дена, иако е единствениот што ги поврзува мариовските села со градот.
– Станува збор за поголема опасност и препораката е да се избегнува овој патен правец деновиве се додека не се отстрани свлечиштето. Известени се Македонија пат, Јавното препријатие за регионални и магистрални патишта, Министерството за транспорт и врски, како и ЕВН. На овој пат поминуваат тешки товарни возила од „Македонски шуми“ и од неколкуте рудници за мермер и минерални суровини кои ги има во Мариово. Очекуваме наскоро да биде затворен за тешките товарни возила. Инаку ова е единствен патен правец во Мариово и нема алтернативен, рече Ристески.
Големо свлечиште го затвори патот Прилеп – Дервен и иако е од четврта категорија тој целосно е непрооден, информира Стефаноски. Големото свлечиште со над 1.000 метри кубни земја е под превојот Дервен.