Повеќе од 400 кражби на електрична енергија откри ЕВН од почетокот на годинава. Според компанијата, украдени се над пет милиони киловатчасови и е направена штета од 700.000 евра. Државата е оштетена за процентот на данокот на додадена вредност кој не може да се наплати при кражби.
Кражбите се откриени при редовните контроли на мерните места и специјалните анализи на потрошувачката и испораката онаму каде што постои сомнеж за неовластено користење електрична енергија. За сите корисници се поднесени пресметки за неовластено користење на електричната енергија и кривични пријави.
Во споредба со истиот период лани, кражбите, соопшти ЕВН, се речиси двојно намалени што се должи на континуираната контрола на мерните места, како и на строгите законски мерки.
– Зголемувањето на затворските казни и пресудите му дадоа сериозност на пристапот за сузбивање на овие кривични дела. Од почетокот на годината се донесени вкупно 165 судски пресуди, со девет од нив е изречена затворска казна за неовластено користење електрична енергија. Заедно со петте пресуди од минатата година, вкупно 14 корисници ќе се најдат зад решетки поради кражби на електрична енергија и слични кривични дела, информира компанијата.
Најголемата штета од кражбите, наведуваат од ЕВН, ја имаат корисниците кои редовно ги плаќаат сметките и дистрибутивниот систем. Голема е опасноста по животите и здравјето во близина на кражба на електрична енергија, често се случуваат и експлозии и пожари. Онаму каде има кражби, има чести дефекти и слаб напон.