Сите ветеринарни станици во Македонија ќе добијат овластување за вршење дејност од јавен интерес. Со тоа, ќе имаат право на државната поддршка вредна вкупно 3,5 милиони евра, ќе се разбие досегашниот монопол и ќе се намалат цените на услугите.
Ова го предвидуваат измените на Законот за ветеринарна дејност што го усвои Владата на последната седница.
Како што рече денеска владиниот портпарол Александар Ѓоргиев, со измените се укинува и рокот на секои пет години да се добиваат овластувањата. Ветеринарната амбуланта ќе стекнува таква можност веднаш, од моментот на нејзиното основање.
– Со законските измени ќе се реши долгогодишниот проблем што ги оптоваруваше и ветеринарите и земјоделците. Сега фармерите не ќе мора добитокот да го носат на лекување во друг град и многу поедноставно ќе ги добиваат документите за субвенции, како и дозволите за движење на стоката, истакна Ѓоргиев на прес-конференција.
Меѓу придобивките од Предлог решението е и тоа што се олеснува излезот и влезот на домашните миленичиња, процесот ќе може да се реализира на сите 19 гранични премини.