СДСМ реагира на , велат, сериозниот скандал, кога во кичевските села, ДУИ незаконски постави 30 метарски јарболи со албански знамиња, а Али Ахмети упати директна провокација до институциите на системот и до својот коалиционен партнер Груевски, дека никој не смее да ги симне.
Во истиот ден воРадуша, во попладневните часови, ДУИ постави и споменик на Аднан Јашари на тенк на македонските оружени сили.
Ова според СДСМ е политичка провокација која ги предизвикува и заострува меѓуетничките тензии во државата, за да им се додворат на своите гласачи пред изборите напролет.
Ова, велат, е омилениот начин на владеење на ВМРО – ДПМНЕ и ДУИ. Тие посакуваат тензии и нестабилност, затоа што во такви услови најдобро ја маскираат својата неспособност да ја водат државата.
„Сакаме директно да ги прашаме г-нот Ахмети и г-нот Груевски, дали сте свесни, кој е исходот од ваквото Ваше неодговорно однесување и штетни политики?Со ваквите постапки, или ќе предизвикате нови меѓуетнички тензии или целосно ќе ја суспендирате правната држава и владеењето на правото?Не може, не е логично, владините коалициони партнери за сите други надлежности на Владата да функционираат перфектно, од тендери до министерски фотељи, а само за најчуствителното прашање, како меѓуетничките тензии да не можат да се разберат меѓу себе.Ова не е ништо друго, освен коцкање со иднината на земјата заради дневно политичките потреби на власта“, рече потпретседателот на СДСМ, Гордан Георгиев.
Ги повика ВМРО ДПМНЕ и ДУИ да ја покажат истата сложност и соработка и за меѓуетничките односи, и пред да стане доцна да седнат и да најдат заедничко решение за сите чуствителни прашања и проблеми кои самите ги предизвикале, бидејќи стабилните меѓуетнички односи се еден од столбовите на македонската држава.
„Наместо да продаваат лажен соживот преку скапи рекламни спотови, ВМРО ДПМНЕ и ДУИ конечно мора да престанат да креираат нови проблеми и да се посветат кон зачувување на добрите меѓуетнички односи“, рече Георгиев.