Екипите на зимската служба на Град Скопје во текот на изминатата ноќ и денеска до 13 часот фрлија 140 тони сол на градските булевари и улици, особено на критичните места.
Екипите на зимската служба, како што информираат од Град Скопје, со возилата со ринење интервенираа низ градските сообраќајници и на критичните точки, односно на сите мостови, клучки, надвозници, подвозници и високите зони кон Водно, Пржино, Железара, како и на сите други таканаречени „црни точки“ во градот.
Екипите нa ЈП „Комунална хигиена“ се на терен и го расчистуваат снегот и мразот во сите скопски општини.
Зимската служба на Градот ја следи состојбата на терен и ќе интервенира според потребите.
Од Градот Скопје препорачуваат на возачите да возат внимателно и да се придржуваат на условите на коловозите и потсетуваат дека во надлежност на Град Скопје се булеварите и одредени градски улици, а преостанатите улици се во надлежност на општините и тие се задолжени за нивно чистење и одржување.
Се апелира и до граѓаните, куќните совети и сопствениците на деловните објекти да се придржуваат до законската обврска за чистење на снегот од приодите до нивните објекти.