Францускиот амбасадор Кристиан Тимоние денеска беше во посета на Куманово каде оствари средба со кумановскиот градоначалник, а ја посети и гимназијата „Гоце Делчев“ каде функционираат билингвални паралелки на француски и македонски јазик.
По средбата, градоначалникот Зоран Дамјановски и францускиот амбасадор Тимоние истакнаа дека разговарале за состојбите во Македонија на локално ниво и за односите меѓу различните заедници во Куманово.
Амбасадорот Тимоние изјави дека функционирањето на локалните власти е многу важно и повика поскоро да се разреши политичката криза, бидејќи, како што посочи, се работи за голема одговорност и би требало да им се овозможи на локалните власти да функционираат без проблем.
– Сето тоа треба да оди во насока да се разреши оваа криза и јас навистина сум оптимист дека тоа ќе се случи, рече Тимоние.