Заради особени заслуги во развојот на односите меѓу Франција и Македонија, Илинка Митрева ќе биде одликувана со орден „Офицер на Националниот ред за заслуги“ на Република Франција. Орденот ќе и го врачи францускиот амбасадор во Македонија Кристијан Тимоние, во име на претседателот на Република Франција.
– Госпоѓата Илинка Митрева, професор по француска книжевност на Филолошкиот факултет во Скопје и поранешен министер за надворешни работи, го добива ова значајно француско одликување за нејзините особени заслуги во развојот на односите меѓу Македонија и Франција, во приближувањето на францускиот јазик и книжевност кај младите генерации. Високо се вреднува и нејзиниот ангажман во промовирањето на Франкофонијата и на европските вредности во Македонија, се вели во орбазложението за доделувањето на орденот.
Орденот за Национални заслуги на Франција, воспоставен во 1963 година од страна на генералот Де Гол, е едно од најпрестижните француски одликувања. Со него се наградуваат воени или цивилни лица, Французи или странци, коишто имаат особени заслуги за Република Франција. Одликувањето се доделува со указ на претседателот на државата.