Ја имам честа на 23-тиот роденден на Социјадемократскиот сојуз на Македонија да зборувам за слободата, еднаквоста и правдата. Тоа е СДСМ. Денеска, во нашата земја за жал нема ни слобода, ни еднаквост, ни правда. Ние, граѓаните на Република Македонија не ги уживаме своите права загарантирани со Уставот, рече претседателотна СДСМ, Зоран Заев, на средбата со жителите на Кратово.
Тој им се заблагодари што и покрај дождот дојдоа во голем број да го слушнат и да го поддржат во концептот за Промени.
-Благодарение на вас, јас сум непоправлив оптимист. Сите заедно да опстоиме храбро на браникот на вистината и на правдата за да на крајот од оваа битка сите да се гордееме. Крајот на диктаторот се гледа. Пред вистината и доказите Груевски продолжува да лаже. Наша задача е да го демаскираме Никола Груевски, а на изборите на 27-ми април да го делегитимираме, затоа што Македонија не е негова приватна компанија, повика Заев во Кратово.
Жителите на Кратово зборуваа за комуналните и егзистенцијални проблеми со кои се соочуваат во 21-от век. Тие сакаа да говорат и за претседателот на државата. Велат дека актуелниот претседател ниту еднаш не застанал на страната на обесправените и беспомошните.
Тој никогаш не беше на наша страна, затоа што не е наш претседател, тој е претседател на Владата на Груевски, беше еден од коментарите од присутните на средбата.
Претседателот на СДСМ, Зоран Заев, во моментов е на собир со граѓани во Крива Паланка.
