Земјоделието не е лесно, ама куќа направив. Денес не можам ни сметките за струја да си ги платам а не пак на децата и внуците да им помогнам, се пожали еден од земјоделците во Удово на средбата со заменик претседателката на СДСМ Радмила Шекеринска.
СДСМ ќе води аграрна политика преку која државата нема да зема ништо од земјоделецот. 0% персонален данок за земјоделците е новина која ние ја нудиме. На овој начин вие ќе имате помали давачки а побогата живеачка, нагласи Шекеринска.
Заедно со Шекеринска денеска на средби со граѓаните беше и потпретседателот на СДСМ, Ванчо Узунов.
Системот на Република Македонија е повеќепартиски и тој функционира на промена. Моќта е кај нас, граѓаните. Затоа, во недела да гласаме за промени, за напредок, рече Узунов.
Од Удово Шекеринска продолжи на средби со граѓани во Валандово, село Николиќ и Дојран.
-За овие 8 години сиромаштијата во Македонија е дуплирана. Во овие 10 дена, со гласот на Груевски и потписот на Јанкулоска покажавме каде се парите на граѓаните: во врвот на власта. 3 и пол милиони евра во кеш земале додека биле во опозиција, замислете колку ли земале овие 8 години додека се на власт и располагаат со буџет од милијарди евра, рече Шекеринска.
Еден ден пред избори функционерите на ВМРО-ДПМНЕ доаѓаат овде и нудат пари за да гласаме за нив. Само ден пред избори мислат на нас, ова мора да запре, коментираа во жителите во Николиќ.
-Ни ја земаа државата, ни ги земаа парите и сега со тие пари сакаат да не поткупат. Оваа власт покажа дека може да ни ја земе и работата, и живеачката, и слободата. Ама во недела ниту една сила не може да ни го одземе правото на глас. Во недела секој граѓанин е помоќен од власта, порача Шекеринска во Дојран.
