„Стоп за екстерното тестирање”, „Не за екстерното, да за нормалното“. Со вакви пароли и извици учениците од основните и средните училишта во Тетово излегоа на мирен протест пред општинската зграда.
Го изразија своето незадоволство од одлуката на Министерството за образование и наука од следната недела да се отпочне со екстерно тестирање во училиштата.
Тие сметаат дека овој чекор, на крајот од учебната година, ќе предизвика голем стрес особено кај оние од помала возраст и дека одлуката за надворешна проверка на стекнатите знаења нема биде во корист на учениците ниту на професорите.
„Јас сум против екстерното тестирање зошто не е миродавно еден тест да оценува за цела година“ рече средношколецот Шенол Скендеровски.
Учениците протестот го продолжија со марш по главните сообраќајници низ градот се до тетовскиот плоштад.
