Градоначалникот на Град Скопје, Коце Трајановски, заедно со директорот на ЈП „Паркови и зеленило“ Душко Авировиќ, денеска со садењето 1.000 хризантеми во кружниот тек на булеварот Митрополит Теодосиј Гологанов, симболично ја почна акцијата за садење есенски цвеќина на повеќе локации низ градот Скопје.
-Станува збор за активност на Градот Скопје и ЈП „Паркови и зеленило“ со која се поддржува проектот „Цветно Скопје“ и во текот на есенва ќе се задат вкупно 250 000 парчиња есенско-зимски расад, од кои 200 000 парчиња се виола (темјанушки) и 50 000 хризантеми. Цвеќињата ќе се засадат во сите 10 скопски општини, односно по жардиниерите на сите булавари, во зелените површини на кружните текови, во Паркот Македонија, Градскиот парк, Паркот Жена-борец, паркот во општина Чаир и зелените површини пред општина Чаир, пред општината Бутел и сите други зелени површини.
– Ланската година беа засадени околу 500 000 цвеќиња, а во текот на месец мај беа засадени и 25 000 рози, а следната пролет планирано е да се засадат уште 10 000 рози. За реализација на овој проект Градот Скопје од Буџетот издвои 1,8 милиони денари, но нема да застанеме и во иднина ќе продожиме да работиме на разубавување на изгледот на градот – истакна градоначалникот Трајановски.
Есенскиот расад од 250 000 цвеќиња ќе се засади на површина од 10 000 квадратни метри, распоредени во сите 10 скопски општини.
На терен ќе работат екипите на ЈП „Паркови и зеленило“, a за реализација на овој проект од Буџетот на Градот ќе се издвојат околу 1,8 милиони денари.
