Градоначалникот на Град Скопје Коце Трајановски и директорот на ЈП „Градски паркинг“ Борче Јакимовски денеска го пуштија во употреба новоизградениот паркинг-простор покрај булеварот „Митрополит Теодосиј Гологанов“, зад објектот на Автомото сојузот на Македонија.
– Со новоизграденото паркиралиште ќе стопанисува ЈП „Градски паркинг“ и таму ќе може да се паркираат 111 возила. Паркингот е со површина од 1.389 метри квадратни, а за реализација на овој проект од буџетот на Град Скопје се издвоени 2,8 милиони денари.
– Со изградбата на овој паркинг на жителите на околните згради и на вработените во институции во негова близина ќе им се овозможи полесно наоѓање паркинг место. Град Скопје со финансирање на изградбата на нови паркинзи му помага на ЈП „Градски паркинг“, рече Трајановски и додаде оти ЈП „Градски паркинг“ успешно стопанисува со постојните паркинзи.
Цената за паркирање на паркингот ќе изнесува 25 денари од час, а за станарите на околните станбени објекти се обезбедени поволности, како и на преостанатите градски паркиралишта.
На изградба на ова ново паркиралиште работеа екипите на ЈП „Улици и патишта“.