Од Форумот на жени на СДСМ од Куманово, по повод претстојниот празник 8-ми март, денеска ги посетија штитеничките на услугите на домот за стари лица „Зафир Сајто“.
Тие имаа можност да разговараат со корисничките на услугите во домот и да им ја пренесат празничната атмосфера.
– Со разговор со вработените и штитеничките на домот се обидуваме да им го честитаме празникот, да внесеме свежина, радост во нивните животи, денови и на тој начин да им обрнеме внимание-изјави Лидија Тасевска, заменик координатор на Форумот на жени на СДСМ од Куманово.
Инаку форумот како и претходните години и оваа ќе организира низа активности за да го одбележи празникот на жената. Координаторката на форумот, Атина Мургашанска истакна дека утре на Градскиот плоштад во Куманово ќе се одржи хуманитарен базар.
– Ги повикуваме сите наши членки, симпатизери и сите граѓани на Куманово да дојдат од 12 до 15 часот и со своите креативни изработки, ракотворби, специјалитети да придонесат да се соберат средстава, кои ќе бидат наменети за семејства на кои им е потребна оваа помош-изјави таа.
Инаку Форумот на жени на Куманово ќе учествува на маршот кој што го организира Социјалдемократскиот сојуз, а кој е планирано да се одржи на 8-ми март во Тетово. Од Куманово е планирано да заминат 500 членки, а за сите заинтересирани граѓани има организиран превоз.
Е. Г.