Во самиот центар на Куманово, секојдневно паѓаат делови од фасадата и надворешниот ѕид на една стара трошна куќа, која се наоѓа на ул. „Илинденска“.
Жителите кои што мора да поминат покрај куќата, за да влезат во своите домови стравуваат дел од ѕидовите и кровот да не ги повредат.
-Ни прети опасност, бидејќи секој ден поминуваме тука, немаме друг влез. Освен што може да повреди човек, може да нанесе штета и на соседнава куќа. Пред три, четири години прв пат се сруши мал дел од куќата, по што сопствениците интервенираа – изјавија жителите.
Куќата долги години претставува опасност за жителите, но и за двете баби кои што се уште живеат во неа.
Жителите пред две недели поднеле молба до Секторот за урбанизам и одделението за градежна инспекција, при Општина Куманово, но од таму се уште чекаат одговор.
-Градежната инспекција излезе, снимавме, меѓутоа не е наше да донесуваме одлуки, бидејќи куќата има сопственици. Доколку постои одредена опасност Секторот за урбанизам треба да ни достави елаборат, за да може да дејствуваме – изјавија од Одделението за градежна инспекција.
Загрижените жители побарале средба и со градоначалникот на Куманово, Зоран Дамјановски, но вработените им рекле дека не може да ги прими, бидејќи е на пат.
Тие бараат надлежните да преземат некакви мерки или сопствениците да најдат начин и да ја санираат старата дотраена куќа, пред да се урне и да предизвика несакани последици.
Елена Георгиевска