Во еуфорична атмосфера, пред преполната сала во хотел Епинал, „Сојузот за иднината“ во Битола вечерва ја одржа својата конвенција на која се промовираа кандидатот за градоначалник Менде Диневски, листата на советници предводена од Васко Ковачевски и изборната програма.
Конвенцијата започна со младите, кои ја претставува „движечката сила на патот до победата“.
На конвенцијата беа промовирани и видеоспотови и 3Д-анимации за приоритетните проекти на кандидатот Менде Диневски од изборната програма. Пред присутните најпрво се обрати носителот на советничката листа Васко Ковачевски:
„Вечерва, како во оваа сала така и во нашата Битола, гледам луѓе сплотени и единствени. И од левицата, и од десницата, па и од центарот. Па, вечерва во првите два реда од оваа сала има повеќе битолчани отколку вчерашниот митинг на ДПМНЕ. Оваа листа ги спои младоста, искуството и знаењето. Младите ќе ја покажат својата креативност и енергичност и ќе го вратат младешкиот дух на Битола, а нашите идни советнички ќе се залагаат за европските критериуми за правата на жените и семејните вредности.
– Сите ние како идни советници ќе ги слушаме проблемите на нашите сограѓани и заедно со Менде неодложно ќе ги решаваме“, изјави Ковачевски
Потоа свое излагање имаше кандидат за градоначалник Менде Диневски.
„Битола е нашиот дом! Град кој со љубов и посветеност е граден низ вековите. Место со душа и шмек, со кое ние битолчани сме бескрајно горди. Токму затоа, драги битолчани – време е! Време е заеднички да се избориме за нашата иднина и на нашите поколенија да им оставиме општина во која вреди да се работи и живее, да се основа семејство и да се старее“.
Диневски понатаму во својот говор промовираше дел од најважните приоритети, кои се дел од изборната програма: гасификација на Битола по примерот на Струмица и Куманово; изработка на нов Генерален Урбанистички План со што ќе се овозможи севкупен развој на Битола; изградба на современ затворен градски пазар; изградба на повеќенаменска сала за спортски, културни и музички настани со што битолчани ќе имаат репрезентативен објект за овој тип на манифестации; ееконструкција на градскиот стадион под Тумбе Кафе кој е заборавен од страна на актуелната власт.
„За таква општина вреди да се живее и за таква општина вреди да се бориме! И ќе се избориме, и заеднички ќе започнеме неуморно да ја градиме нашата Битола! Иднината сега! Време е!“, заврши Диневски.