Градоначалникот на Град Скопје, Коце Трајановски, и директорот на ЈП „Комунална хигиена“, Ракип Дочи, денеска ги промовираа новите пластични контејнери што се набавени за потребите на ЈП „Комуналана хигиена“.
– Со цел да се подобри подигањето на отпадот на територијата на градот Скопје, се набавени 200 пластични контејнери, со зафатнина од 1,1 м3. 150 контејнери се со зелена боја и зелен капак и се наменети за одлагање комунален отпад, а 50 се со зелена боја и жолт капак и се наменети за одлагање ПЕТ- амбалажа. Со поставувањето на новите контејнери, кои се отпорни на надворешните влијанија и се тешки само 25 килограми, ќе се подобри изгледот на градот и ќе се олесни работата на вработените во ЈП„ Комуналана хигиена“.
– Во изминатите години се набавени и поставени на повеќе локации низ градот и 116 трикоморни мрежести контејнери за селективно собирање отпад, но нашите искуства не се целосно позитивни, бидејќи дел од граѓаните во нив одлагаат неселектиран отпад, а значителен број се и оштетени. Сакам да упатам апел до граѓаните да бидат повнимателни при селектирањето на отпадот и да не ги оштетуваат контејнерите – истакна градоначалникот Трајановски.
Директорот на ЈП „Комунална хигиена“, Ракип Дочи, ги информираше присутните дека набавката на новите контејнери е само продолжување на активностите на претпијатието, кое ги следи трендовите на светските метрополи, но и доказ за грижата за почиста животна средина.