Финансиската полиција со асистенција на МВР го заплени тутун пронајден во осум објекти во Љуботен. Во селото има полициски хермелини и камиони за пренос на запленетата роба. Неофицијално, запленети се и машини кои се пронајдени во претресените објекти. Од Финансиската полиција велат дека постојат сомненија дека жителите во чии куќи се прави заплената, криумчареле акцизна стока и правеле царински измами.
Градоначалникот на Бутел, Велимир Смилевски беше во селото, за време на заплената. Тој изјави дека тутунот не е илегален, туку е стекнат со работа на фамилиите.
„Се надевам дека брзо ќе заврши оваа голгота на народот и се ќе се реши низ институциите на системот. Со сигирност тврдам дека тутунот не е нелегален“, рече градоначалникот Смилевски.
Жителите на селото и натаму се гневни. Тие велат дека ако имале друг начин за заработка, немало да работат со тутун, а акцијата ја оценуваат како срам за државата.
Од Финансиската полиција побараа разбирање и соработка од жителите. Од институцијата не споделија повеќе информации, велејќи дека тоа е во интерес на истрагата.