ДУИ најверојатно нема да ја напушти Владата, за да се донесат законите од евроагендата и за да не се блокира пристапниот дијалог со Европската унија.
Ова го пренесува „Плусинфо“, и според порталот ВМРО-ДПМНЕ бара начин да го одложи донесувањето на законот за бранителите, но од ДУИ се очекува да возврати со симнувањето на таблите со албански имиња на четирите училишта во Чаир. Партијата на Ахмети тешко ќе се согласи на тој услов, но би можела да го жртвува градоначалникот Изет Меџити, кој би најавил дека веќе нема да се кандидира.
Плусинфо пишува, според нивните информации дека акцијата за спасување на Владата ја води Штефан Филе, еврокомесарот за проширување. На ова упатувале и денешните средби на Ахмети со двајца европски дипломати – Гарф Ламбсдорф од германското министерство за надворешни работи, и амбасадорот на Евроспката унија во земјава, Аиво Орав.
Изворите на Плусинфо проценуваат дека на Груевски, сепак, нема да му биде лесно да го повлече законот за бранителите и дека по секоја цена ќе настојува на брзи предвремени избори. Поголем дел од раководството на ДУИ исто така е против ваквиот компромис, сака да падне владата, но не и итни избори.