Станарите од зградата во „Скопјанка“ кои денес беа евакуирани поради остар мирис, се сомневаат во објаснувањето дадено од полицијата.
Како причина за миризбата и евакуацијата се наведе нечистотија од еден од становите, каде што имало голем број на искористени пелени, но еден од станарите за „А1он“ изјави дека не верува оти само тоа е проблемот.
Тој раскажа дека неговата внука ја ваделе од зградата специјалци со гас маска, а децата кои биле излезени од зградата кашлале.
Градоначалникот на град Скопје, Петре Шилегов изјави дека миризбата во зградата во Аеродром биле користени пелени кои не биле фрлени. Тој покажа и фотографии од станот на кои се гледаат пелените.
Станарите од „Кузман Јосифовски Питу“ повеќе од шест часа седеа пред зградата, за кое време полицијата, противпожарната служба и војската пребаруваа во зградата.