На прошталната вечера на шефицата на европската дипломатија, Федерика Могерини, со лидерите од Западниот Балкан, било изразено жалење за блокадата врз Македонија и Албанија за старт на преговори на последниот ЕУ Самит.
Ова го соопштија од Кабинетот на Могерини по завршувањето на вечерата која се одржа во Брисел вечерва.
-Високата претставничка и лидерите од Западниот Балкан разменија мислења за односите ЕУ-Западен Балкан и настаните во регионот. Тие изразија жалење поради одлуката на Европскиот Совет да не отвори преговори за членство со Северна Македонија и Албанија и се согласија дека ЕУ интеграцијата на Западниот Балкан останува клучна стратешка цел, во заеднички интерес на ЕУ и на регионот, порачаа од Кабинетот на Федерика Могерини по средбата.
Могерини и лидерите од сите земји регионот, освен Еди Рама, разговарале за постигнувањата во последните пет години на релација ЕУ – Западен Балкан и ја повториле нивната „силна заложба“ кон европската перспектива и реформите кои произлегуваат од неа.