Денес, министерот за надворешни работи, Никола Димитров оствари средба со министерот за одбрана на Република Словенија, Карл Ерјавец, кој престојува во официјална посета на Република Македонија.
На пленарните разговори меѓу делегациите беа потврдени одличните билатерални односи меѓу двете земји, а се разговараше и за можностите за зајакнување на соработката во повеќе области од заемен интерес.
Димитров го запозна Ерјавец со процесот на спроведување на Конечната спогодба со Грција и претстојните чекори на овој план. Тој истакна дека Република Македонија од секогаш ја уживала безрезервната поддршка од Република Словенија во исполнувањето на своите надворешно политички приоритети, особено на планот на интеграцијата во НАТО, посочувајќи ја важноста на словенечката амбасада во Скопје, која од оваа година е контакт амбасада за НАТО.
Ерјавец упати честитки до Димитров и Владата на Република Македонија за направениот исчекор на земјата од нивното стапување на функција и нагласи дека Словенија го поддржува НАТО интегративниот процес на Република Македонија и дека ќе направи се’ за тој процес да биде успешен. Министерот Ерјавец ја потврди традиционално добрата соработка меѓу двете земји во областа на одбраната, како и подготвеноста на Република Словенија за натамошно пренесување на словенечките искуства од пристапувањето кон ЕУ.