Обвинителката Елизабета Јосифовска која беше дел од СЈО, на првото рочиште во идната година за „Рекет“, ќе сведочи пред судијката Васка Николовска-Масевска. Јосифовска е првата обвинителка која е повикана да даде исказ во случајот кој се води против ексшефицата на СЈО, Катица Јанева и Бојан Јовановски. Таа беше и заменик-шефица во Специјалното јавно обвинителство, назначена од Јанева, а со тоа, имаше право да потпишува документи и одлуки кои ги носи СЈО.
Заменичката на Јанева е предложена како сведок во „Рекет“ од обвинителката Вилма Русковска која го застапува предметот.
Токму обвинителката Јосифовска го потпиша позитивното мислење за да му се врати пасошот на Орце Камчев кој е осомничен во „Империја“, предмет на СЈО за кој Камчев платил милион и пол евра на Бојан Јовановски за да влијае кај Катица Јанева за да се запре истрагата против него. Таа за потпишаното решение рече дека одлуката била на Јанева, а таа била должна да стави потпис бидејќи шефицата била на одмор.
Јосифовска беше и една од вработените во СЈО која даваше исказ во Обвинителството за организиран криминал за време на истражната постапка. Освен неа, на распит кај Русковска беа и Лиле Стефанова која го води случајот „Империја“ и Бурим Рустеми кој го води предметот „Поштенска банка“.
Претходно, на рочиштето в петок, пред судот за случајот „Рекет“ ќе сведочат ексвработен во „1ТВ“, Христијан Баневски и поранешниот маркетинг директор на „Оне“, Виктор Доневски.