Поранешниот шеф на кабинетот на Сашо Мијалков, Тони Јакимовски, понудил гаранција за да се брани од слобода во предметот за злоупотребите со спецкасата на УБК, но судот го одбил.
Од судот за „А1он“ ја потврдија информацијата: „Одбраната на посоченото лице има поднесено предлог за укинување на мерката притвор со понудена гаранција до Кривичниот совет, предлог што е доставен на мислење во надлежното Јавно обвинителство за гонење организиран криминал и корупција, со оглед дека мерката притвор е определна по предлог на посоченото обвинителство. По добиено негативно мислење од надлежното обвинителство, советот има донесено решение со кое предлогот се одбива како неоснован и е доставен до странките во постапката“. Јакимовски има право на жалба до Апелацискиот суд.
Судењето за злоупотребите со спецкасата во УБК почнува следната недела. Ќе го суди судијата Владимир Туфегџиќ.
Против четворица поранешни вработени во УБК, Тони Јакимовски, Петре Пешовски, Стево Маџовски и Кристина Јосифовска, Обвинителството за гонење организиран криминал и корупција поднесе обвинение за злоупотребени пари од над 820 илјади евра.
Во временскиот период од 2007 до 2017 година, во 172 наврати за потребите на касата за исплата на средствата за посебни намени на УБК, од одделот за финансии при Министерството за внатрешни работи подигнале парични средства за кои поднесувале барања и признаници за износите. Без да имаат посебно одобрение од директорот на Управата, без да биде формирана омисија за ништење на материјална документација и без записници, ги уништиле евиденциите за потрошените средства заедно со документацијата за исплата. Со ваквите дејствија го оштетиле државниот буџет.