Едно лице загина, друго е повредено во сообраќајна несреќа што се случила синоќа на регионалниот пат Кавадарци – Росоман, кај месноста Северова Падина, потврди утрово Анита Стојковска, портпарол во СВР Велес.
Во несреќата учествувале патничко моторно возило „опел омега“ со кавадаречка регистрација управуван од кавадарчанец роден 1979 година, мопед „томос“ управуван од 20-годишен неготинец и пешак од Кавадарци, роден 1979 година.
– Возачот на мопедот заедно со пешакот стоеле на десниот раб од коловозот при што наишол патничкиот моторен автомобил и при заобиколувањето удрил во нив. Од ударот, на лице место загинал моторциклистот, а пешакот се здобил со телесни повреди и бил пренесен во кавадаречката болница по што бил пуштен на домашно лекување, појасни Стојковска.
На лице место увид извршија јавен обвинител, истражен судија, увидна екипа од СВР Велес, соопшти Стојковска.