Иако помина една недела по одронот на карпите кај велешкото село Мартолци, пругата е се уште непроодна. Според Јавното претпријатие Македонски Железници Инфраструктура теренот е веќе исчистен, но поради тоа што постои можност за нови одрони, возовите не се пуштени да сообраќаат по овој дел од пругата.
– Како Инфраструктура на Македонски Железници им понудивме на луѓето два автобуса. Тие ќе се превезуваат со воз до Стариград, потоа со автобус до Мартолци од каде ќе ги чека воз до крајната дестинација, рече портапоролот на МЖ Инфраструктура, Незат Мемути.
Тој додаде дека во тек е процедурата за избор на квалитетна компанија која ќе го минира тој дел со цел да нема човечки жртви.
Инаку, жителите од тој предел претходно се пожалија дека се работи за голема карпа која паднала и неколку дена стои на пругите. Жителите велат дека била избегната голема трагедија, бидејќи за неполн час на тоа место поминувал воз.
Луѓето се револтирани бидејќи, како што тие велат, тој дел се санира многу споро, а железничкиот сообраќај им е многу потребен на луѓето и додаваат дека доколу не изреагирале на време, никој немало да обезбеди некаков транспорт додека да се санира целосниот проблем на тој дел и пругата повторно да биде функционална.
Александар Тодески