Фановите на Тоше Проески се жалат дека Град Скопје несериозно се однесува кон нив и стравуваат дека годинава под знак прашалник ќе се доведе одржувањето на традиционалната средба „Ѕвездено небо“ во чест на нашата најголема поп ѕвезда.
– На 26 јуни годинава поднесовме барање до Град Скопје, со цел да ни дадат одобрување да го одржиме настанот на петти октомври на плоштадот „Македонија“. За жал, до ден денес немаме добиено конечен одговор и сè уште сме во исчекување. Во меѓувреме, сме информирани дека на тој датум ќе се одржува друг настан „Бела ноќ“. Поради тоа, побаравме средба со градоначалникот Коце Трајановски за да добиеме конкретен одговор на нашето барање. Таа средба сè уште не се случила и пак сме оставени во исчекување. Ние сме многу изреволтирани, бидејќи кон нас се однесуваат крајно несериозно и непрофесионално – велат фановите.
Тие додаваат дека се обиделе да го замолат организаторот на „Бела ноќ” доколку може да го помести настанот еден ден порано бидејќи им е важно настанот да се одржува секоја година на ист датум и локација, но не наишле на разбирање.
– Овој настан за нас е од големо значење, бидејќи нашиот идол на неговиот последен концерт остави аманет да нè види следната година на истиот датум во што поголем број. Поради тоа, овој настан сакаме да остане традиција, а масовната посетеност изминативе години покажува дека народот нè поддржува во тоа. Поради проблемите со кои се соочуваме, ние сме приморани да бараме нова локација, со која би го деградирале значењето и големината на Тоше, или крајно да се откажеме. Бараме медиумска поддршка, бидејќи вие сте глас кој институциите не можат да го игнорираат, како што нè игнорираат нас. И покрај сè, ние се надеваме дека овие проблеми ќе бидат надминати и нема да се повторат во иднина. Ова го работиме со голема љубов и посветеност, а крајна цел ни е одржување на споменот на нашата најголема музичка ѕвезда и запознавање на помладите генерации со ликот и делото на Тоше Проески – велат од фондацијата и од фан страницата за Тоше.