Џафери-Шарец: Македонија е позитивен пример за постигнување заеднички решенија преку дијалог

Од:

Претседателот на македонското Собрание Талат Џафери, кој престојува во официјална посета на Словенија, оствари средба и со претседателот на словенечката Влада, Марјан Шарец.

На средбата, како што соопшти прес-службата на македонското Собрание, Џафери изразил благодарност за постојаната поддршка што Македонија ја добива од Словенија на нејзиниот пат кон реализација на стратешките цели, притоа укажувајќи дека таа е нашиот прв промотор во Обединетите Нации во времињата исполнети со предизвици, како и дека одиграла клучна улога во промовирање на независноста на Република Македонија во Европа и светот.

Словенечкиот премиер ја поздравил храброста на Македонија за преземените чекори кон евроатланската интеграција и оценил дека Македонија е позитивен пример за постигнување на заеднички решенија преку дијалог од кои придобивка ќе имаат сите земји во регионот. Од страна на Словенија е понудена и помош во знаење и искуство во текот на интеграцискиот процес на Македонија.

Шарец изразил задоволство и што Словенија ќе биде втората земја после Грција која ќе го ратификува Протоколот за пристапување на Македонија во НАТО и искажал убедување дека со овој чекор Македонија ќе започне ново поглавје на градење на европски вредности кои гарантираат подобар живот за сите граѓани и безбедност за странските инвестиции.

Од страна на претседателот на македонското Собрание е потенцирано дека по ратификацијата на Протоколот од страна на националните парламенти на земјите – членки на НАТО, се очекува Македонија до крајот на годинава или почетокот на следната година да стане 30-тата членка на Алијансата.

Џафери посочил дека парламентарното мнозинство и Владата, свесни за безбедносните предизвици во регионот и поставените стратешки цели на граѓаните, се определиле за надминување на отворените прашања со соседите. Ја поздравил визијата на Словенија за интегриран и стабилен Балкан во НАТО и ЕУ, како и заложбата за просперитетен регион без конфликти и отворени прашања. Ја потенцирал и успешноста на состаноците од Процесот Брдо – Бриони, како и тоа дека земјите учесници мора да соработуваат и да изградат меѓусебна доверба како чекор пред нивната целосна европска интеграција.

Двајцата соговорници оцениле дека односите меѓу двете земји се на високо ниво и дека има простор да се интензивира и продлабочи економската соработка.

Би можело да ве интересира

Седници на Буџетскиот совет и собраниската Комисија за здравство

Ана Ололовска

Донесени законите за основно образование и за наставници и стручни соработници во основните и средни училишта

Ана Ололовска

Независната пратеничка група на ВМРО-ДПМНЕ бара прераспределба на комисиите и учеството во работните тела на Собранието

Ана Ололовска

Последна пленарна седница пред летната собраниска пауза

Ана Ололовска

Седници на шест собраниски комисии

Ана Ололовска

Утврдени кандидатските листи за членови на советите на АВМУ и на МРТ

Ана Ололовска