Претседателот на Собранието, Талат Џафери вели дека денешната седница ќе се одржи иако нема кворум.
Тој рече дека седниците ќе се одржат и дека моментално имааат координации. Во пленарната сала има само 10 пратеници. На седницата на чиј дневен ред денеска треба да биде второто читање на предлог-законот за употребата на јазиците присутен е и министерот за правда Билен Салији.
Како што најави лидерот на ВМРО-ДПМНЕ, Христијан Мицкоски, опозициската партија не е во пратеничките клупи на денешната седница, на чиј дневен ред беше изборот на уставни судии и предлог-законот за употреба на јазиците.
Собранието требаше да расправа и за измените и дополнувањата на Законот за работните односи, прво читање, поднесен од 11.868 избирачи и неколку други закони и одлуки. На почетокот на денешната седница беше отворен претрес за предлогот за избор на Осман Кадриу за судија во Уставен суд, но немаше ниту пријавени за збор, ниту кворум за гласање.
К.Л.