Двајца моторциклисти се тешко повредени денеска во сообраќајна незгода патниот правец Струга – Дебар, во близина на селото Враништа.
Портпаролот на СВР Охрид Стефан Димоски информира дека несреќата се случила околу 13 часот кога патничко моторно возило марка „Тигуан“ со струшки регистарски таблици удрил во моторциклистите со италијански регистарски ознаки.
– Незгодата е случена во момент кога „тигуанот“ се движел во правец од Струга кон селото Велешта, извршил непрописно престигнување на возило кое се движело пред него и директно удрил во моторциклистите, изјави Димоски.
Поврдените, според него, се пренесени во Општата болница во Струга, а подоцна еден од нив бил префрлен во Специјалната болница за ортопедија и трауматологија „Св. Еразмо“ во Охрид. Моторциклистите, додаде Димоски, се надвор од животна опасност.
Сообраќајот се одвива тековно, за време на увидот сообраќајот се пренасочувал по алтернативни патишта.
