Кумановската подружница на Јавното претпријатие „Македонски Шуми“ за тековната сезона издаде дваесетина дозволи за собирање на споредни шумски плодови. Граѓаните од поширокиот регион во сезоната пролет-лето во Козјачијата најчесто берат чаеви и печурки.
– Плодовите кои се собираат потекнуваат од еколошки чиста, незагадена средина, а поединците ги берат и ги носат за откуп, информираше Ленка Јанковска инженер од подружницата.
Дел од собирачите ги продаваат споредните шумски плодови, дел ги користат за лична употреба.
Компании од Македонија вршат откуп на чаевите и печурките кои растат во недопрената природа на овој крај од поширокиот кумановски регион. Собирачите најчесто се жители на селата, луѓе кои имаат викендици и кои со години наназад ги користат ресурсите на природата за надополнување на семејниот буџет.
Шумочуварските служби вршат контрола на терен.