Носење закони за зеленило и за квалитет на почвата се приоритети на ДОМ за првата година од работатат на новата влада, истакна денеска на прес-конференција претседателката на партијата Лилјана Поповска.
Таа посочи дека во предизборниот договор со ВМРО – ДПМНЕ биле договорени пет програмски заложби за заштита на животната средина.
– Носење закони за зеленило и за квалитет на почвата во првите 100 дена, што ќе значи институционална заштита на зеленилото во градовите, но и поинакво урбанистичко планирање, со загарантиран процент зеленило на ниво на град и парцела и контрола на почвите, отстранување на загадениот дел и садење чисти почви, како гаранција за здрава храна, рече Поповска.
Според неа, ќе се преземат мерки престанок на загадувањето од големите загадувачи и деноноќно следење на нивната работа. До крајот на првата година, Поповска вети зајакнување на системот за мониторинг и контрола на квалитетот на воздух, вода и почва, преку доекипирање на инспекторатите за животна средина со луѓе, опрема и мерни станици, целодневно и во викенди и целосно решавање на отпадот во Македонија. Почнувајќи од современи депонии, преку ефикасен систем за собирање електронски отпад, батерии и акумулатори, со посебен акцент на опасниот отпад.
– ДОМ ќе продолжи да работи и на останатите наши приоритети како што се социјална правда, еднакви можности за сите, посебно за маргинализираните групи, за развој на науката и културата, натамошен пробив на обновливите енергии, енергетска ефикасност и туризмот, борба против ГМО, заштита на природните реткости и ред други теми од зелената агенда, нагласи Поповска.