Зелената партија ДОМ апелира ЈСП Скопје да овозможи континуиран автобуски превоз за граѓаните, во периодот од 5 до 19 часот, кога нема полициски час.
„Граѓаните реагираат дека сегашниот возен режим на автобусите од јавниот градски превоз, во две смени од 5 до 9 и од 13 до 19 часот, го отежнува завршувањето на нивните обврски. Во некои случаи чекаат и по 2-3 часа, да започне втората смена од возниот ред, за да можат да го користат јавниот превоз“, велат од ДОМ.
Од Партијата сметаат дека континуираниот градски автобуски превоз ќе придонесе и за намален број патници во еден автобус, што е во согласност со мерката за одржување физичка дистанца, поради заштита од корона вирусот.