По повод изборот на Александер Ван дер Белен за нов претседател на Австрија, кој е поранешен лидер на Зелените, претседателката на ДОМ, Лилјана Поповска испрати честитки до него лично и до сестринската партија на австриските Зелени.
Во честитката се истакнува дека ова е успех на умерената, прогресивна и толерантна политика што е карактеристична за европските зелени партии, чиј идеал е обединета Европа. Ова е и најголем успех на Зелените во Европа досега, со што Австрија го доби првиот претседател на држава од нивните редови.
Упатувајќи најсрдечни желби за успешно извршување на оваа одговорна функција, партијата ДОМ, како членка на европското семејство на зелени партии, ќе продолжи со натамошна интензивна пријателска и конструктивна соработка со Зелената партија на Австрија, во интерес на своите земји и на европската идеја.