Со денешната трибина Форумот на жени на ДОМ ја започна кампањата за измена на Изборниот законик со цел 50 проценти жени на избирачките листи, која ја најави на 8. март годинава.
Форумот на жени на ДОМ предлага „патент“ модел, односно наизменичен распоред според полот на листата на кандидатите (маж-жена, односно жена-маж).
Овој принцип, соопшти денеска ДОМ, ќе доведе до унапредување на родовата рамноправност, зголемено учество на жените и нивното влијание во политичките партии и во севкупниот политички живот во општеството. Тоа, според ДОМ, ќе овозможи искористување на потенцијалот на голем број компетентни жени, што ќе води кон демократизација и ќе претставува огромна придобивка за целото општество.
Ова е и заложба на Обединетите Нации, насловена како „Планета 50-50 до 2030 година“.
ДОМ, стои во соопштението, доби поддршка од Демократскиот сојуз и Либералната партија, како и од Македонското женско лоби. Во наредниот период партијата ќе бара поддршка и од другите политички парти, невладини организации и граѓаните на Република Македонија.