Во рамки на наградната игра „Да рециклираме и да се наградуваме“ која ја организираа лиценцираниот колективен постапувач, „Елколект“ и општина Куманово денеска беа доделени пет награди за граѓаните на општина Куманово кои депонираа електричен или електронски апарат во еден од еко магацините .
Во наградната игра, која има за цел да ја подигне свеста за одлагање на овој вид отпад на точно определени локации, учествуваа близу 400 граѓани.
-Акцијата има за цел да ги поттикне граѓаните да го отстранат опасниот отпад од домашните и деловните простории и да го остават на пропишани места, истакна Бобан Бојковски, овластен инспектор за животна средина во општина Куманово.
Посочи дека акцијата продолжува и по завршување на наградната игра и дека граѓаните ќе можат да го остават електронскиот и електричниот отпад во Куманово на веќе утврдените локации.
Според, надлежните од „Елколект“ се очекува да бидат собрани 12 тони отпад. Здравко Зинзиров, маркетинг менаџер од компанијата посочи дека овој отпад е штетен по човековото здравје и дека постојат „диви“ депонии каде се депонира овој отпад кој и штети на непосредната животна средина.
Конкретни податоци, колку електронски и електричен отпад има, во Македонија не постојат но се претпоставува дека има неколку стотици тони, велат од „Еколект“.